«Мича асыв» чукöрлö – 35 год!
04 мая 2021
Апрель 30 лунö Ыджыт Кочаись культура керкуын порйöтiсö «Мича асыв» творческöй чукöрлiсь 35-годся юбилей. Медодзза годдэзас ансамбльнас веськöтлiс Андрей Гагарин, а кыкдас годся унажык ни чукöрсö туйдöтö Анна Теплоухова. «Мича асылiсь» сьылiсь-йöктiссесö поздравитicö Кочевскöй районiсь юралiссез да Коми-Пермяцкöй округись юралiсьлöн вежись Мария Макарова. Мария Александровна шыöтчис коллектив дынö то кытшöм кыввезöн:«Дона Анна Ивановна да «Мича асыв» чукöрись мича ныввез да зоннэз!
Вежалуналам тiянöс чукöрлiсь 35-годся юбилейöн!
Коми-Пермяцкöй округын «Мича асывлöн» творчествоыс тöдса быд мортлö; тöдöны да радейтöны тiянöс и Пермскöй край да финно-угорскöй мир пасьта. Тiйö кужат бытшöма мыччавны миян отирлiсь культурасö йöз муэзын и бура пантавны гöссесö Парма муын.
«Мича асывлöн» ай-лöсьöтiсь Андрей Гагарин кадсянь öння луннэзöдз тiйö дугдывтöг кошшат да ловзьöтат важся-важ обряддэз да орсаннэз, öктат вунöтöм сьыланкыввез, кöдна сыбöрын пырöны округись сьылан-йöктан чукöррез репертуарö.
Муöдз копыр тiянлö эта колана удж понда, кöда оз сет кусны отир традицияэзлö да зорöтö коми-пермяккезлiсь ассяма культура.
Кöсъям «Мича асывлö» уна мича лун, гажа сьыланкыввез да виль вермöммез, а чукöрись сьылiсь-йöктiссезлö – крепыт здоровье, ыджыт шуд да тырдоз».
Фотографияэз сетic «Кочевская жизнь» нима газетаись гижись Е.Останина
